Гулакен

Ар ав̌ле̂, ар Гу̊лакен

Лу̊м ғал хурдат̌ созакен

Муйсафед молене̂ вуст

Ят ху, му пале̂янд нуст

Да̄м пе̂ сивдат̌, туло дуст

А, бос, ва де̂ ху насв̌ор

Е̂ қиссаярдум хумор

Д̌усте̂ д̌од сафед бу̊нен

Ое̂саранд в̌е̂ юẋкен

Наẋтойден ар му цемен

Нала ваден одамен

Ху Мав̌лоярд бандаен

Баракат вуд ар в̌ев бен

Ар қисса, аз саре̂ ба̄р

Вуд, нала, ику̊данд ẋар

Дишанденте̂ туд̌ вуд̌ҷ қоқ

В̌е̂д̌ виц лап аз мун ат нок

Етен виц диве̂ ат тоқ

Мардум, нала, вуд беғам

Бегу̊на мис вуд в̌ев қав̌м

Жир дарунен вуд илоҷ

Ху номусен напард̌од

Е̂ турға̄ виц ат е̂ дег

Якдигарарден виц нек

Ар ҷумаен вад якҷо

Гозаксе̂дте̂ тамошо

Аз диланд вуд в̌ев салу̊м

Ишқ дарунен вад муду̊м

Навуд бой, навуд ғулу̊н

Инсу̊нен вад икду̊нд

Рузо вид, фук су̊д в̌еру̊н

В̌ад̌ рине̂сен аз ху ҷу̊н

Якдигар кинен беҷу̊н

Ца урмат бед, ца инсу̊н

На в̌ев ну̊м ат на ниẋу̊н

Яст вид ёд̌дта во дав̌ра

Лак рине̂сам фук дав̌ра

Лак рине̂сам мам ҷау̊н

Лак вире̂ям во ху ҷу̊н

Бадта д̌е̂ям во тар пу̊нд

Ар ав̌ле̂, ар Гу̊лакен