Маймун Тиҷорат

Цифен лап аз Худ̌ой, ноқис тилабен

Ба бу̊на да̄як ат фоиз тилабен

Намозанд зикре̂ен ‘бахиẋ ке̂ ма̄шард’

Ид анҷа софат̌о ма̄ҷиз тилабен

Нақлум тамард е̂а̄

Нафам пед̌о сиц азка̄

Туло ру̊й д̌е̂ц йа̄ тар му дафтар

Узум, анҷа, е̂ соқе̂

Шароб мам му соз мане̂

Масте̂ навард̌е̂е̂, қарор мар

Вуд е̂ ду̊ндозе̂ ҷинга̄л

Зич ат тамба̄ ат пурғал

Подẋо яманд, малуме̂ га̄п, шер

Арҷо ба̄д қонун қув̌ат

На ноқе̂ бофт, на абрат

Фақат ту под̌ен ту кинен сер

Ҷинга̄ланд ба̄д е̂ қоида̄

Зинда̄ ику, арчай зинда̄

Зиндаге̂ ба̄д фарқ аз қашоқе̂

Ẋитум мис цад̌ид аз д̌ев̌

Қонуне̂ сайде̂ пок — г̌ев̌

Марде̂ навирт тар нотифоқе̂

Ча̄нг ат минқор ат д̌инду̊н

Цуғ киẋт сина̄ ат биẋту̊н

Аз ра̄ганд де̂ д̌ид тармезак хун

Хоẋ ат сумб мис де̂ ганда̄

Ангихт ма̄рге̂ даранда̄

Ид зеб, ид рисқ, ид кайф, ид қонун

Ҷинга̄ланд ба̄д чиз форум

Мард вард̌ед видов̌ ẋитум

Под̌енен в̌ахтанд де̂ чуд ху кор

Пала̄нг де̂ мот сут ху, нуст

Налу̊вдта ‘номард рицуст’

Ат чуртта д̌ид ‘зибуд марде̂в̌ор’

Ҷинга̄л аз тирте̂ фук барг

Аз бир — удуде̂ сад ма̄рг

Ат ма̄рг цемен фукв̌ахт ғидора̄

Арҷо ма̄рг цад̌ид адаб

Нист ҷосус ата ҷалаб

Мидов̌ мард ҷинов̌ фук таёра̄

Ҷинга̄л байнва е̂ дарё

Ҷу̊не̂ ҷинга̄ле̂ дунё

Шере̂ ба̄д ҷинга̄лард де̂ чуд қайд

Арчирд цасу̊д ẋац залул

Су̊д ху, бире̂здта бепул

Ẋацбиреẋтандо накинет сай

Чуẋтат яттен сад гуру

Парандаен ат оу

Тар ẋацлав якҷо икв̌е̂ шастте̂

Юрẋ ат пала̄нг ат сусмор

Маг̌ʓу̊нҷената̄, қарор

Марде̂ фарқо аз бачамарде̂

Ҷинга̄ланд сар афлотун

Шайту̊н ат макре̂ — маймун

Дарахт ну̊лте̂ се̂рт ат че̂в̌д ху ноф

Фана̄ярде̂ икид қайт

Ару̊ме̂ чуде̂ в̌ев сайд

Нист айв̌у̊н ю над̌ид дамте̂ лоф

Тахлиде̂ в̌е̂ шер қонун

Ẋацбире̂ẋт цаха̄вд маймун

Ка̄м-ка̄мен дам баёд̌ в̌ед̌д дам касб

Цад̌оде̂ ẋац арай қуп

Арай ангихт тап ат туп

Дамте̂ аз арай тараф, ид ғасп

Шеранд вуд ига елу̊н

Де̂ ят тар ҷинга̄л инсу̊н

Айв̌у̊нен рицит̌ет ба ар да̄р

Якбор одам де̂ ят ғул

Маймун ар байн ху, сатул

Хуб маймуне̂ ху, в̌ев қатир ẋа̄р

Ба̄д аз чанд солат, йа̄ ят

Айв̌у̊н айру̊ну айрат

‘Е̂ро, икам на ика̄ меминак?’

Ху пу̊сте̂ чуг̌ҷ кут ат ра̄нг

Аз ноф аредга — дис та̄нг

‘Аҷаб зур’ тезат̌е̂ лу̊д ру̊пцак

Фана̄ен сат в̌ам мухлис

Маймуне̂ ҷа̄м чуд маҷлис

У̊, чаранда̄ ата̄ даранда̄

Чунке̂ одам ҷау̊нанд

Аз мунде̂, тар му му̊нанд

Узум дига в̌е̂ намоянда̄

Майму̊н лу̊вд ‘ҷанобе̂ шер’

Форт турд ма̄жозат, ве̂ сер

Дам дарё пас кинам ва пулте̂

Тут сар ғулла̄ ме̂наткаẋ

Магам ту мис харе̂ ба̄ẋ

Ҷинга̄лардам фук ху залулте̂

Ба̄ден де̂ д̌од дам ҷинга̄л

Дарахтен ẋичуẋт е̂ ка̄л

Қоидае̂ айв̌у̊нот де̂ сут чул

Бед қиммате̂е̂ табиат

Марде̂ ат худ̌ойшукрат

Маймунанд е̂ мақсад — фақат пул

Ẋичиф ат меминакен

Фукат̌ в̌ам луқ цемакен

Фукҷо в̌ам га̄п ата̄ сиёсат

Ру̊пц ат дивуск ат шағол

В̌ам коркунен, дис фаол

В̌ев мид̌те̂ ẋой ‘Маймун Тиҷорат’

Вуде̂ тар ҷинга̄л вазен

Бандет арча̄й ғаразен

Қонун хаẋ анҷет, мала̄кет суст

Соф бетоқат сут е̂ урҷ

В̌ед̌де̂ дам маймунте̂ бурҷ

Фук урҷенен в̌ите̂ят̌ чуд чуст

Айв̌у̊н, мисоле̂, ẋитум

В̌ев гузар соф д̌од ар д̌ум

Дорен ху тижд, чирден шикоят?

Юрẋ ҷино ча̄й баномус?

Начембтен видов̌ ҷосус

Ба̄ден соф чуд тарке̂ в̌илоят

Нава̄рд̌ед г̌ев̌чид пала̄нг

Ду̊нҷат в̌е̂ питана̄ та̄нг

То в̌уцт, гав̌азнента кинен тур

Цав̌ед̌д мис ху тар е̂ ла̄нг

Надед̌д ар в̌ам пу̊ст в̌е̂ ча̄нг

Ду̊нҷат в̌инд шич фукв̌ахт педикюр

Урҷ дам ҷинга̄лард де̂ бед

Зере̂ арча̄ ата̄ в̌ед

Пургхел наẋтуйд, фук дарғиме̂ẋт сут

Рузе̂ руханд бехабар

Чуẋтат в̌е̂ẋт ду̊ндоз арар

Ат де̂ в̌е̂ẋт, фук в̌ам даркире̂ẋт сут

Маймун рафиқга хуẋгов̌

Боде̂, на чуш фа̄мт, на сов̌

Юта лу̊вдат, йа̄та киẋт ма̄қул

Арв̌ахт в̌ам мему̊н хуẋгов̌

Рухец т̌ад маймун циров̌

Ат сараке̂ сифиде̂ ẋац пул

Ҷинга̄лард лап сут ситху̊н

Туẋна̄ цамуг̌ҷ ид айв̌у̊н

Бу̊й ҷинга̄лард, чирм д̌ед дармун

Маймун чуд ра̄намое̂

Пул парҷивет аз мое̂

Йа̄ фукв̌ахт зинда̄ ар ẋац дарун

Мое̂ дод̌ чуд тар наанг

Наанг че̂андид ба ҷанг

Маймун ра̄нг мис якбор сут сафед

Амо наанг ғуллара̄нг

Дарё в̌амард лапат̌ та̄нг

Баде̂ чанд в̌ахт ẋоҷ аз наанг бед

Лу̊ве̂ ‘наред ẋо илоҷ’

Ат маймун ғал над̌е̂рт ẋоҷ

Яе̂ чурт д̌од̌ҷ, цара̄нг насу̊д айф

Чуден ҷинга̄лард машур

Муборакбод ата̄ сур

Айв̌у̊н пицен де̂ гард̌ент тар кайф

Еғире̂ сут рухсат

Шаробарден чуд уҷат

Де̂ лақт в̌евра̄нг лингенте̂ лак-лак

Мода сут исте̂фода̄

Таза̄ наред е̂ мода̄

Нарен мастат, модаен шилак

Дарав̌ наред ҷинга̄л

Ет сут жир, пиҷог, пигал

Одаменен цемқа̄т арам чуẋт

Ре̂з ат на̄р мис де̂ сут от

Цанард мис сут барав̌от

Ка̄нде̂ пу̊ст хурд ёдата̄, ка̄нд гуẋт

Е̂ руза̄т, са̄рат̌ в̌а̄зен

Дам дарё дарун вазен

Ẋац пицте̂ цив̌ин, аранг намад

Хун пур дарё даруна̄, на̄ла лап оҷигуна̄

Зив̌осчен — тика̄ маймун ҷасад

Ила̄в лу̊вен ‘наанг кор’

Ила̄в хуẋгов̌ кинен бор

Гуё дев байнандат̌ ẋуʓакен

Зибо де̂ сут ма̄лум, фукат̌ен де̂ д̌од че̂д̌ум

Маймунен хурд де̂ зид̌ҷ мурʓакен

Ид ҷинга̄л де̂ сат ҷазир

Зима̄д̌е̂ тафсу̊н чуд хир

Мурʓакенен пид̌ид ар ху ре̂ʓ

Ẋикуден че̂ҷа гигурд

Ба̄ден над̌од дароз чурт

Ростат̌, ғулат̌, тупат̌ в̌е̂ пе̂ не̂ʓ

Мурʓакенен лап қабот

На в̌ев садо, на в̌ад̌ от

А̄мен сер ху чуд, а̄м ю кор сут

Цав̌инчен марге̂ маймун

На̄ла хурдат̌ сут ҷаюн

Хубат̌е̂ чуд тика̄ ху ат рут

Маймун мис ав̌ал рицост

Тару̊д чостат, тарам чост

Нист дарахт я сифинт пе̂ в̌ам ну̊л

Илоҷга нист, ар дарё — ҷу̊не̂ ҷинга̄ле̂ дунё

Ат арам в̌ад̌ мое̂ен ар қу̊л

Урҷ соф айру̊н ар зинду̊н

Туф киẋтат, на̄ла ‘ёру̊н’

Ма̄шам хурд нафа̄мч қадре̂ мурʓак

Шере̂ де̂ анҷувҷ ху кил

Фил-филга тар в̌е̂ чост фил

Хуẋгов̌е̂ де̂ д̌од нофор чапак

Ҷинга̄л ид ҷое̂ ма̄ҷиз

Дам лап фамен — д̌ист фоиз

Аред мав̌ҷудот азор-азор

Сипаг̌ дод̌е̂ хилутак, а̄рай под̌, д̌у бирутак

Ат де̂ жириг̌д, филандо таёр

Икам соз бепид̌инде̂ пид̌

Сад пид̌ ниғу̊г̌, азор пид̌

Мане̂ навире̂е̂, қарор мар

Мам мане̂ мис турд лу̊мат

Маманд яст мам дав̌у̊мат

Мурʓакенен де̂ цифч му дафтар