Халқе̂де̂ ар ху заму̊н

Халқе̂де̂ ар ху заму̊н умре̂ цакиẋт доғате̂ в̌а̄м мирд

Ба дуо д̌а̄м че̂зу̊н, лу̊м е̂ наҷот, ногин, ва̄м мирд

Мунд му цемен пуре̂ юẋк вад ху, нав̌интум руе̂ Азрат

Ат му юẋк риẋт ху, де̂ чуẋтум му Худ̌ой ка̄л мис ха̄м мирд

Халқе̂де̂ ят̌ч пе̂ ме̂ хог̌ ку ба ибодат ху Худ̌оярд

Куе̂де̂ ям цанад̌ид нимаке̂ осил ат на̄м мирд

Ба ибодат цанаят̌ч ям пе̂ ме̂ кусор, пе̂ ку пас

Накире̂ẋче̂ ику Худ̌оё ху зиёфат ху пе̂ дам мирд

Ба̄д чиду̊м суфе̂е̂ нимшаклта цалу̊вд ‘дузах мирд афт’

Талх гуноенгата ар увд цакиẋт в̌изаке̂ ҷа̄м мирд

Халқе̂де̂ ар ху заму̊нанде̂ ху дузах чуд бииẋт хурд

Чуде̂ арчиз ику Худ̌ой мирд паду̊д, киẋтра а̄рам мирд

В̌ине̂ халқ маст, ю ху бахтанд — на фалак д̌ид пе̂ в̌е̂ бахт ҷу̊н

Ат ме̂ халқард е̂ гуноҷате̂ — азор доғате̂ ға̄м мирд

Фалакард ят̌ч ала̄м, аз ме̂ гуно пас ба наза̄р зе̂зд

Яме̂ нур пинʓ цачуг̌ҷ, дис хаẋ ала̄м мирд

О, фалак, мардат ту, чунке̂ азолиме̂ нанав̌е̂

Мардат, чунке̂ на осу̊н кине̂ята, нага ра̄м мирд

О, фалак, га̄рд̌е̂ а̄га икде̂ ху суратте̂ кахой ту

Мунд му халқ лап хаẋ мард, узта ту аслога над̌а̄м мирд

Халқе̂де̂ минд ме̂ бузургу̊н намарен қарнате̂ асранд

Чунке̂ моден ат марентаят, ху маш мис цамара̄м мирд

Халқе̂де̂ минд ме̂ тақдир Худ̌ой бенте̂ нивишчин

Ат е̂ қоғазте̂, Заиф, чизга нивишт ид ту қалам мирд?