Г̌ин о г̌иник

Г̌ин ку пе̂ро вад о г̌иник?

Гул ку базебде̂ ё гулик, а, му ҷу̊н?

Ту икшичат̌ де̂ фикре̂ ке̂

Ё ца̄ẋ чоят ё каш ẋипик

Диҷат лу̊м г̌ин ку пе̂ро вад о г̌иник?

Гул ку базебде̂ ё гулик, а, му ҷу̊н?

Чизард ику 'ик' тар пале̂ су̊д?

Чизард кутат̌ рист ат бирик

Ду̊нҷат туто в̌ам жив̌ҷ цачуд

Йа̄ г̌ин навад, йа̄ вад г̌иник

Диҷат лу̊м г̌ин ку пе̂ро вад о г̌иник?

Гул ку базебде̂ ё гулик, а, му ҷу̊н?

Вудат, лу̊дат 'туто му г̌ин'

'Дига олам пас турд торик'

Ат г̌иникҷа фукв̌ахт енак

Йа̄ ку арам в̌инт — йа̄ г̌иник

Диҷат лу̊м г̌ин ку пе̂ро вад о г̌иник?

Гул ку базебде̂ ё гулик, а, му ҷу̊н?

Ма̄лум 'му г̌иник', ид ту 'му'

Олам накиẋт кут ат ʓулик

Ту цеменард е̂ умре̂ — г̌ин

Азор цемард фукв̌ахт — г̌иник

Диҷат лу̊м г̌ин ку пе̂ро вад о г̌иник?

Гул ку базебде̂ ё гулик, а, му ҷу̊н?

Ҷудое̂ аррақамта ёд̌д ху

Ишқ рицит̌т ẋуп-ẋупик

Цамирт азизтарин мис

Г̌ин ҷойте̂ во де̂ ёд̌д г̌иник

Диҷат лу̊м г̌ин ку пе̂ро вад о г̌иник?

Гул ку базебде̂ ё гулик, а, му ҷу̊н?

Тунд ив̌ баша̄нд, цавор ту дал

Цавор ху, пинʓ ху, д̌ист чилик

Г̌инта туё пед̌о кине̂

Худ̌ое̂ чуд пед̌о г̌иник

Диҷат лу̊м г̌ин ку пе̂ро вад о г̌иник?

Гул ку базебде̂ ё гулик, а, му ҷу̊н?

Заифе̂ лу̊вд 'ик' нист насаб

Ю биде̂ фа̄мт миҷозе̂ 'ик'

Чорик ику, цавиртта г̌ин

Ат мард — де̂ биде̂ фа̄мт г̌иник